اسٹیٹ بینک آف پاکستان (ایس بی پی) نے یومِ یکجہتی کشمیر کے موقع پر تعطیل کا اعلان کر دیا ہے۔
جاری اعلامیے کے مطابق حکومتِ پاکستان کے فیصلے کی روشنی میں جمعرات 5 فروری 2026 کو اسٹیٹ بینک بند رہے گا۔
مرکزی بینک کے مطابق اس روز تمام بینکاری سرگرمیاں بھی معطل رہیں گی اور بینکوں میں معمول کا کام اگلے ورکنگ ڈے سے دوبارہ شروع ہوگا۔
اس سے قبل وفاقی حکومت نے بھی 5 فروری کو یومِ یکجہتی کشمیر کے سلسلے میں ملک بھر میں عام تعطیل کا نوٹیفکیشن جاری کیا تھا۔
دوسری جانب حکومت پنجاب نے 6 فروری کو بھی صوبے میں عام چھٹی کا اعلان کیا ہے۔ صوبائی حکومت کے مطابق بسنت کے موقع پر یہ تعطیل دی جا رہی ہے۔
وزیراعلیٰ پنجاب مریم نواز نے سوشل میڈیا پلیٹ فارم ایکس پر اپنے بیان میں کہا کہ پنجاب میں 5 فروری کے کشمیر ڈے کے بعد طویل ویک اینڈ ہوگا، کیونکہ 6 فروری کو بسنت کی چھٹی، 7 فروری کو ہفتہ اور 8 فروری کو اتوار ہوگا۔
