پشاور: خیبر پختونخوا کے مختلف علاقوں میں کاؤنٹر ٹیرارزم ڈیپارٹمنٹ (سی ٹی ڈی) کی کارروائیوں کے دوران 6 دہشت گرد مارے گئے۔
ترجمان سی ٹی ڈی کے مطابق ضلع خیبر کے علاقے جمرود میں خفیہ اطلاع پر کارروائی کی گئی۔ جمرود کے شاہ کس بائی پاس روڈ پر واقع ناکے کلے میں فائرنگ کے تبادلے میں 3 دہشت گرد مارے گئے۔
ترجمان کے مطابق مارے جانے والے دہشت گرد فتنہ الخوارج کے سرگرم ارکان تھے۔ اور فورسز پر حملوں، قتل، اقدام قتل، بھتہ خوری اور دیگر دہشت گردانہ سرگرمیوں میں ملوث رہے ہیں۔
کارروائی کے دوران مارے جانے والے دہشت گردوں سے اسلحہ اور بارودی مواد بھی برآمد ہوا۔
دوسری جانب پشاور کے نواحی علاقے ٹپوسانو باچا قبرستان میں بھی کارروائی کے دوران فتنہ الخوارج کے 3 دہشت گرد مارے گئے۔
