محکمہ یونیورسٹی اینڈ بورڈز سندھ نے نویں سے بارہویں جماعت تک نیا گریڈنگ سسٹم تیار کر لیا جو آئندہ تعلیمی سال سے نافذ العمل ہو گا۔
نئے نظام کے تحت کل نمبرز اور پرسنٹیج کے بجائے گریڈز کی بنیاد پر نتائج جاری کیے جائیں گے، پاسنگ مارکس میں بھی تبدیلی کر دی گئی ، نئے سسٹم میں پاسنگ مارکس کو 33 فیصد سے بڑھا کر 40 فیصد کر دیا گیا ہے۔
50 تا 59 فیصد نمبر لینے والے طلبہ کو ڈی گریڈ ملے گا، 60 تا 69 فیصد پر سی گریڈ، 70 تا 74 فیصد پر بی گریڈ، 75 تا 79 فیصد پر بی پلس، 80 تا 84 فیصد پر بی پلس پلس گریڈ ملے گا۔
اس کے علاوہ 85 تا 89 فیصد پر اے گریڈ، 90 تا 94 فیصد پر اے پلس جبکہ 95 تا 100 فیصد نمبر حاصل کرنے والے طلبہ کو اے پلس پلس گریڈ دیا جائے گا۔
محکمہ یونیورسٹی اینڈ بورڈز کا کہنا ہے کہ نیا گریڈنگ سسٹم بین الاقوامی معیار سے ہم آہنگ ہے اور اس سے طلبہ کی کارکردگی کا منصفانہ انداز میں تعین ممکن ہو گا۔
