جنوبی افریقی بیٹر میتھیو بریٹزکی نے ون ڈے کرکٹ کی تاریخ کا 38 سالہ ریکارڈ توڑ کر نئی تاریخ رقم کر دی۔
جنوبی افریقا کے لیے صرف 5 ون ڈے میچز کھیلنے والے نوجوان بیٹر میتھیو بریٹزکی نے انگلینڈ کے خلاف دوسرے ون ڈے میں ایک اور نصف سنچری بنا کر ون ڈے کرکٹ میں مسلسل پانچ نصف سنچریاں بنانے کا منفرد اعزاز حاصل کر لیا۔
بریٹزکی نے انگلینڈ کے خلاف 85 رنز کی اننگز کھیلی۔ یہ ان کے 5 میچز پر مشتمل ون ڈے کیریئر کی مسلسل پانچویں نصف سنچری تھی۔
جس کے بعد میتھیو بریٹزکی ون ڈے ڈیبیو کے بعد مسلسل 5 میچز میں 5 ففٹی پلس اسکور کرنے والے دنیا کے پہلے بیٹر کا اعزاز اپنے نام کر لیا۔
برِیٹزکی نے رواں سال فروری میں نیوزی لینڈ کیخلاف ون ڈے ڈیبیو میں 150 رنز کی اننگز کھیلی تھی ، کیریئر کے دوسرے میچ میں پاکستان کیخلاف 83 ، تیسرے میں 57 اور چوتھے میچ میں 88 رنز بنائے۔ برِیٹزکی اب تک اپنے ون ڈے کیریئر کے 5 میچز میں 463 رنز بنا چکے ہیں۔
