بیساکھی میلہ اور خالصہ جنم دن کی تقریبات میں شرکت کے لیے بھارت سے تقریباً سات ہزار سکھ یاتری پاکستان پہنچ گئے۔
یاتریوں کا واہگہ بارڈر پر پرتپاک استقبال کیا گیا، سکھ یاتریوں کی آمد پر واہے گرو جی کا خالصہ، واہے گرو جی کے نعروں سے ماحول گونج اٹھا۔
اس موقع پر سکھ یاتریوں کا کہنا تھا کہ ان کی برسوں پرانی دعا آج قبول ہوئی، اور وہ بابا گرونانک کی دھرتی پر قدم رکھ کر روحانی خوشی محسوس کر رہے ہیں۔
یاتریوں کے پہلے گروپ کو خصوصی بسوں کے ذریعے واہگہ سے پنجہ صاحب حسن ابدال جبکہ دوسرا گروپ کرتارپور کے لیے روانہ ہوا۔
پاکستان سکھ گوردوارہ پربندھک کمیٹی کے سربراہ سردار رمیش سنگھ اروڑہ نے کہا کہ پاکستان نے ہمیشہ کشادہ دلی سے سکھ یاتریوں کا استقبال کیا ہے اور مذہبی ہم آہنگی و محبت کا پیغام دیا ہے۔
