محکمہ موسمیات نے اسلام آباد، مری سمیت مختلف علاقوں میں بارش کی پیشگوئی کی ہے۔
محکمہ موسمیات کے مطابق ملک کے بیشترعلاقوں میں موسم سرد اور خشک جبکہ پہاڑی علاقوں میں رات کے اوقات میں شدید سرد رہنے کا امکان ہے۔رات کے اوقات میں پنجاب کے میدانی اضلاع میں درمیانی سے شدید دھندچھائے رہنے کا امکان ہے۔
مشرقی پنجاب،کشمیر، مری،گلیات اور گرد و نواح میں چند مقامات پر تیز ہواؤں اور گرج چمک کے ساتھ بارش اور پہاڑوں پر ہلکی برفباری کا امکان ہے۔
اسلام آباد اور گرد و نواح میں موسم سرد اور مطلع ابر آلود رہنے کی توقع ہے، چند مقامات پر ہلکی بارش کی پیشگوئی ہے۔
لاہور، شیخوپورہ، قصور، اوکاڑہ، ساہیوال، سیالکوٹ، نارووال، گوجرانوالہ، رحیم یار خان، خان پور، بہاولنگر، بہاولپور، پاکپتن، خانیوال اور گرد و نواح میں چند مقامات پر گرج چمک کے ساتھ بارش ہونے کی توقع ہے۔
