مالاکنڈ یونیورسٹی میں منعقد کئے جانے والے خیبر پختونخوا کے سب سے بڑے میٹرکس پاکستان یوتھ سمٹ کا پانچواں ایڈیشن اختتام پذیر ہو گیا۔
ایونٹ میٹرکس پاکستان، ڈائریکٹوریٹ آف یوتھ افیئرز، خیبر پختونخوا انفارمیشن ٹیکنالوجی بورڈ اور حکومت خیبر پختونخوا کے اشتراک سے منعقد ہوا تھا جس کا مقصد نوجوانوں کو تحریک دینا اور مختلف شعبوں میں جدت کو فروغ دینا تھا۔
سمٹ میں سائبر سکیورٹی، مصنوعی ذہانت اور ڈیجیٹل مارکیٹنگ جیسے جدید موضوعات کو زیر بحث لایا گیا۔ شرکاء کو آن لائن مارکیٹنگ اور برانڈنگ کے جدید طریقوں کے حوالے سے مشورے دیے گئے۔
سمٹ میں پاکستان بھر سے 10 ہزار سے زیادہ طلباء نے شرکت کی، اس کے علاوہ مختلف شعبوں کے ماہرین، تعلیمی شخصیات، اور کاروباری حضرات بھی شریک ہوئے ، 20 سے زیادہ کمپنیوں نے اپنی جدید مصنوعات، خدمات اور اختراعات کی نمائش کی۔
