پاکستان کرکٹ بورڈ (پی سی بی) کی جانب سے کھلاڑیوں کے نئے سینٹرل کنٹریکٹس میں کئی کھلاڑیوں کی کیٹیگریز میں تنزلی کا امکان ہے۔
میڈیا رپورٹس کے مطابق قومی کرکٹرز کی کارکردگی کو دیکھتے ہوئے سینٹرل کنٹریکٹس میں تبدیلی کرنے کا فیصلہ کیا گیا ہے۔ کچھ کرکٹرز کی کیٹیگری میں تنزلی جبکہ کچھ کو ترقی دی جاسکتی ہے۔
اس حوالے سے فاسٹ باؤلر نسیم شاہ کی حالیہ کارکردگی کو مدِ نظر رکھتے ہوئے انہیں کیٹیگری اے دینے کا امکان ظاہر کیا گیا ہے۔ ایسا ممکن ہونے سے نسیم شاہ کیٹیگری اے میں موجود بابر اعظم، شاہین آفریدی اور محمد رضوان کو جوائن کرلیں گے۔
دوسری طرف قومی کرکٹر اور سابق نائب کپتان شاداب خان کی ناقص کارکردگی کو دیکھتے ہوئے ان کو اپنی موجودہ کیٹیگری سے ہاتھ دھونا پڑ سکتا ہے۔ اسی طرح دیگر نامور کرکٹرز کی کیٹیگری میں بھی تنزلی کا امکان ہے۔
پاکستان ریڈ بال کرکٹ ٹیم کے کپتان شان مسعود کا کیٹیگری بی میں رہنے کا امکان ہے جبکہ کیٹیگری ڈی میں سب سے اہم تبدیلیاں متوقع ہیں۔ محمد نواز اور عماد وسیم کے لیے سینٹرل کنٹریکٹ ناممکن دکھائی دے رہا ہے۔
