سعودی عرب کے نائب وزیر سرمایہ کاری ابراہیم بن یوسف المبارک نے کہا ہے کہ ہم پاکستان کو اپنے ایک اہم بین الاقوامی شراکت دار کے طور پر دیکھنا چاہیں گے۔
اسلام آباد میں جاری پاکستان اور سعودی عرب سرمایہ کاری فورم 2024 کی افتتاحی تقریب سے خطاب میں انہوں نے کہا کہ پاکستان ایک بڑا سٹریٹجک شراکت دار ہے۔ ہم پاکستانی معیشت کی صلاحیت، ٹیلنٹ اور قدرتی وسائل پر یقین رکھتے ہیں۔
ابراہیم بن یوسف المبارک کا کہنا تھا کہ پاکستان کا دوسرا دورہ ہے، یہاں پُرجوش استقبال پر شکریہ ادا کرنا چاہتا ہوں۔ سعودی اور سعودی کمپنیوں کے لیے پاکستان اعلیٰ ترجیحی اقتصادی سرمایہ کاری اور کاروباری مواقع کے طور پر سمجھا جاتا ہے۔
انہوں نے کہا کہ سعودی عرب 20 لاکھ سے زیادہ پاکستانیوں کا گھر ہے۔ بہت سے پاکستانیوں نے نمایاں طور پر ویژن 2030 میں اپنا حصہ ڈالا ہے۔ آج ہم آپ سب کو جوڑنا چاہتے ہیں کیونکہ ہماری سعودی کمپنیوں کی کامیابی کی کہانیاں شیئر کرنے کے لیے موجود ہیں۔
سعودی نائب وزیر سرمایہ کاری نے مزید کہا کہ سعودی کمپنیاں بین الاقوامی سطح پر اپنی موجودگی کو جاری رکھنا چاہیں گی۔ ہماری تاریخ میں ویژن 2030 کے تحت مملکت میں جامع تبدیلیاں آ رہی ہیں۔
