ویسٹ انڈیز کے آل راؤنڈر روماریو شیفرڈ نے کیریبین پریمیئر لیگ میں حیران کن کارنامہ سرانجام دیا۔
گیانا ایمیزون واریئرز اور سینٹ لوشیا کنگز کے درمیان میچ میں روماریو شیفرڈ نے ایک ہی گیند پر تین چھکے لگا کر 22 رنز بنا دیئے۔
میچ کا پندرہواں اوور کرنے والے بائولر اوشانے تھامس نے متعدد نو اور وائیڈ بالز کیں۔ اوور کی تیسری گیند پر شیفرڈ ایکسٹرا کور پر کیچ آؤٹ ہوگئے تاہم وہ نو بال قرار پائی۔
اگلی گیند وائیڈ قرار دیئے جانے پر فری ہٹ برقرار رہی ، اس کے بعد تھامس نے مزید دو مسلسل نو بالز کیں جن پر شیفرڈ نے دو لگاتار چھکے لگا دیئے ، اس کے بعد لیگل گیند پر بھی چھکا لگا دیا، یوں مجموعی طور پر ایک قانونی گیند پر 22 رنز بنے۔
روماریو شیفرڈ نے 34 گیندوں پر 73 رنز کی شاندار اننگز کھیلی تاہم ان کی ٹیم فتح حاصل نہ کر سکی۔
