آبادی میں تیز رفتار اضافے میں کمی اور اس کو پائیدار سطح تک لانے کیلئے کونسل آف کامن انٹرسٹ کے فیصلوں کے تحت بننے والے نیشنل ایکشن پلان پر عمل درآمد کو یقینی بنانا ہوگا۔
اگر آبادی میں اضافے کی موجود صورتحال برقرار رہی تو 2050 تک پاکستان کو معیشت، تعلیم، صحت اور انسانی وسائل کے شعبوں میں بہت سے مشکلات درپیش آئیں گی۔
یہ بات یو این ایف پی اے کے تعاون سے پاپولیشن کونسل کے زیر اہتمام میڈیا کولیشن میٹنگ میں کہی گئی اس قومی نشست میں پاکستان بھر سے میڈیا سے وابستہ صحافیوں نے شرکت کی۔
اپنے خیر مقدمی کلمات میں پاپولیشن کونسل کے سینئر ڈائریکٹر ڈاکٹر علی میر نے کہا کہ اگر پاکستان نے ترقی کی منازل طے کرنی ہے تو ہمیں اپنی آبادی اور وسائل میں توازن پیدا کرنا ہوگا جس کیلئے سی سی آئی کے فیصلوں پر عمل درآمد کو یقینی بنانا ہوگا۔
