پنجاب بھر میں ہونے والی بارشوں نے تباہی مچادی،مختلف حادثات میں 21 افراد جاں بحق اور 154 زخمی ہوگئے جبکہ لاہور میں اربن فلڈنگ کی صورتحال پیدا ہوئی۔
پی ڈی ایم اے نے پنجاب میں مون سون بارشوں کے نقصانات کی رپورٹ جاری کر دی جس کے مطابق صوبے میں بارشوں کے باعث 21 افراد جاں بحق اور 154 زخمی ہوئے،سیلابی ریلے میں بہنے یا پھنسنے سے کوئی جانی نقصان نہیں ہوا۔
ترجمان پی ڈی ایم اے کا کہنا ہے کہ بارشوں کے باعث پنجاب بھر میں 38 مکانات کو جزوی طور پر نقصان پہنچا،اس دوران مویشیوں کی ہلاکت بھی ریکارڈ کی گئی۔
لاہورکی صورتحال
صوبائی دارالحکومت لاہور میں بارش کے بعد شہریوں کو مشکلات کا سامنا ہے،کیولری سے ڈیفنس روڈ کی جانب سڑک پر پانی موجود ہے ، ڈیفنس موڑ پر پانی جمع ہونے سے ٹریفک کی روانی متاثر ہوئی۔
سمن آباد عارف چوک کی نواحی گلیوں میں پانی کھڑا ہے،ڈیفنس کا غازی انڈر پاس پانی سے بھر گیا،ڈیفنس مین بلیوارڈ کی دونوں اطراف پانی جمع ہونے سے ٹریفک متاثر ہوئی۔
