سانحہ گل پلازہ کی تحقیقات کے لیے جوڈیشل کمیشن کے قیام سے متعلق اہم پیش رفت سامنے آ گئی ہے، رجسٹرار سندھ ہائیکورٹ نے اس سلسلے میں سیکریٹری داخلہ سندھ کو باضابطہ جوابی خط ارسال کر دیا ہے۔
ذرائع کے مطابق وزیراعلیٰ سندھ مراد علی شاہ نے سانحہ گل پلازہ کی عدالتی تحقیقات کے لیے چیف جسٹس سندھ ہائیکورٹ کو خط لکھا تھا، جو چیف جسٹس کو موصول ہو چکا ہے۔
رجسٹرار سندھ ہائیکورٹ کی جانب سے بھیجے گئے خط میں کہا گیا ہے کہ چیف جسٹس سندھ ہائیکورٹ نے وزیراعلیٰ سندھ کے خط کا بغور جائزہ لیا ہے۔
خط کے مطابق چیف جسٹس نے سانحہ گل پلازا کی تحقیقات کے لیے جوڈیشل کمیشن کے قیام پرآمادگی ظاہر کرتے ہوئے کمیشن کے لیے ٹرمز آف ریفرنس (ٹی او آرز) طلب کرنے کی ہدایت جاری کی ہے۔
