پاکستان اور بنگلہ دیش کے درمیان راولپنڈی میں جاری پہلے ٹیسٹ میچ کے دوسرے دن محمد رضوان انجری کے باعث اننگز سے باہر ہوگئے۔
راولپنڈی کرکٹ اسٹیڈیم میں جاری پاک بنگلہ دیش ٹیسٹ میچ کے دوسرے دن پاکستان نے 448 رنز پر اننگز ڈکلیئر کی۔ دوسرے روز کے آخری سیشن میں بنگلہ دیش کی اننگز کا آغاز ہوا۔
بنگلہ دیش کی بیٹنگ کے دوران خرم شہزاد کی گیند پر محمد رضوان نے وکٹ کے پیچھے گیند کو ڈائیو مار کر تھاما۔ جونہی وہ زمین پر گرے تو انکو ٹانگ میں کھچاؤ محسوس ہوا جس کے بعد وہ وکٹ کیپنگ جاری نہ رکھ سکے۔
محمد رضوان کی جگہ گراؤنڈ میں سابق کپتان اور وکٹ کیپر سرفراز احمد نے انٹری دی۔ سرفراز احمد نے بنگلہ دیشی اننگز کے باقی حصے کے لیے گلوز سنبھال لیے۔
خیال رہے کہ پنڈی ٹیسٹ کے دوسرے روز محمد رضوان نے 171 رنز کی شاندار اننگز کھیل کر نائب کپتان سعود شکیل کے ساتھ بہترین شراکت داری قائم کی تھی۔
