پشاور ہائیکورٹ نے الیکشن کمیشن کو پی ٹی آئی رہنما زرتاج گل کے خلاف مزید کارروائی سے روکتے ہوئے الیکشن کمیشن اور دیگر فریقین کو نوٹسزجاری کر دیئے۔
پشاور ہائیکورٹ کے جسٹس وقار احمد اور جسٹس اعجاز خان نے زرتاج گل کی نااہلی کے خلاف درخواست پر سماعت نے کی۔
جسٹس وقار احمد نے درخواست گزار کے وکیل سے سوال کیا کہ آپ لاہور ہائیکورٹ کیوں نہیں گئے؟ وکیل نے کہا کہ لاہور نہ جانے کی کچھ وجوہات ہیں۔
جسٹس وقار احمد نے کہا کہ دیگر درخواستوں کے ساتھ اس کو بھی سنیں گے، آئندہ سماعت پر کیس کے دائرہ اختیار پر بھی آپ کو سنیں گے ، بعد ازاں عدالت نے الیکشن کمیشن اور دیگر فریقین سے جواب طلب کرتے ہوئے سماعت ملتوی کر دی۔
