مشیر سیاسی امور رانا ثنا اللہ نے کہا ہے کہ 9 مئی فسانہ یا ڈرامہ نہیں حقیقت ہے۔
میڈیا سے گفتگو کرتے ہوئے رانا ثنا اللہ نے کہا کہ 9 مئی کو سرکاری اداروں پر حملے کئے گئے، کہا جا رہا تھا شواہد اور عدالتیں کدھر ہیں، 2 سال میں 9 مئی سے متعلق مقدمات چلے اور فیصلے ہوئے، اگر فیصلوں پر اعتراض ہے تو قانون کے مطابق اپیل کریں۔
انہوں نے کہا کہ حکومت مذاکرات کیلئے ہمیشہ تیار ہے، ہمارے خلاف بھی جھوٹے کیسز بنائے گئے تھے، ہمیں بھی جیلوں میں ڈالا گیا، بجٹ منظور ہوا تو وزیراعظم نے اپوزیشن سے بات کرنے کی کوشش کی۔
مشیر سیاسی امور نے کہا کہ جمہوریت مذاکرات سے چلتی ہے ڈیڈلاک سے نہیں، ہم کوشش کریں گے کہ مولانا فضل الرحمان کو بھی ساتھ ملایا جائے، مولانا فضل الرحمان کے ساتھ سیٹ ایڈجسمنٹ کیلئے تعاون کر سکتے ہیں، پچھلے الیکشن میں بھی مولانا فضل الرحمان کے ساتھ ہمارا تعاون رہا ہے۔
