امریکی صدر ڈونلڈ ٹرمپ نے اپنی صحت کے حوالے سے اٹھنے والے سوالات اور افواہوں کا براہِ راست جواب دیتے ہوئے کہا ہے کہ پہلے کبھی اتنا اچھا محسوس نہیں کیا۔
وائٹ ہاؤس کی جانب سے جمعے کے روز جاری کردہ خالی شیڈول نے سوشل میڈیا پر امریکی صدر کے حوالے سے شکوک و شبہات کو جنم دیا، جس کے بعد ان کی صحت کے حوالے سے افوائیں تیزی سے گردش کرنے لگی۔
سماجی رابطے کی ویب سائٹ ایکس پر #TrumpIsDead کے نام سے ہیش ٹیگ ٹاپ ٹرینڈ میں شامل رہا، تاہم ہفتے کے روز صدر ٹرمپ کو اپنی نواسی کائی کے ساتھ گالف کورس جاتے دیکھا گیا، جس نے تمام افواہوں کو دم توڑنے پر مجبور کر دیا۔
جس کے بعد صدر ٹرمپ نے ٹروتھ سوشل پر ایک طنزیہ انداز میں ان تمام قیاس آرائیوں کو مسترد کرتے ہوئے کہا کہ میں نے زندگی میں کبھی اتنا اچھا محسوس نہیں کیا، ڈی سی اب کرائم فری زون ہے۔
امریکی صدر کے اس بیان کو نہ صرف ان کی صحت سے متعلق افواہوں کا جواب قرار دیا جا رہا ہے، بلکہ واشنگٹن میں سکیورٹی انتظامات پر اپنی انتظامیہ کے اقدامات کو اجاگر کرنے کا ایک سیاسی طریقہ بھی کہا جا رہا ہے۔
