بالی ووڈ اداکار اور ہدایتکار فرحان اختر نے اپنی ابتدائی فلمی زندگی کے ایک یادگار مگر شرمندہ کن واقعے کا ذکر کرتے ہوئے کہا کہ 17 سال کی عمر میں وہ فلم ‘لمحے’ کے سیٹ پر معاون ڈائریکٹر کے طور پر کام کر رہے تھے، جب سری دیوی کے ساتھ ایک چھوٹی سی غلطی نے انہیں بہت خوفزدہ کر دیا۔
فرحان کے مطابق شوٹنگ کے دوران وہ غلط جگہ پر چل پڑے جہاں سری دیوی آ رہی تھیں، جس کی وجہ سے ان کا توازن بگڑ گیا اور وہ تھوڑا پھسل گئیں۔
فرحان اختر نے کہا کہ پورے سیٹ پر اچانک خاموشی چھا گئی، مجھے لگا کہ یہی وہ لمحہ ہے جب میرا فلمی کیریئر ختم ہو جائے گا۔ لیکن سری دیوی نے اس صورتحال کو نہایت شاندار انداز میں سنبھالا۔
انہوں نے کہا کہ اُس وقت کے سب سے بڑے اسٹار ہونے کے باوجود، انہوں نے نہ مجھے ڈانٹا اور نہ ہی شرمندہ ہونے کا احساس دلایا، بلکہ خود کو قابو میں رکھا، حادثے کو تسلیم کیا اور شوٹنگ جاری رکھی۔ فرحان کے مطابق یہ تجربہ ان کے لیے سبق آموز رہا اور انہوں نے سیٹ پر نظم و ضبط اور احترام کا درس حاصل کیا۔
