سیب کھانے سے ہاضمے اور وزن پر کیا اثر پڑتا ہے؟

سیب نہ صرف دنیا بھر میں سب سے زیادہ پسند کیا جانے والا پھل ہے بلکہ اسے کھانے سے صحت کے لیے بھی بے شمار فوائد حاصل ہوتے ہیں، اس میں وٹامنز، معدنیات اور خاص طور پر فائبر موجود ہوتا ہے، جو ہاضمے کو بہتر بنانے، وزن کنٹرول کرنے اور بلڈ شوگر کو متوازن رکھنے میں مددگار ثابت ہوتا ہے۔

ماہرین غذائیت کے مطابق سیب کو اپنی روزانہ خوراک میں شامل کرنا صحت مند زندگی کے لیے ایک آسان اور مؤثر طریقہ ہے۔

تحقیق کے مطابق ایک درمیانے سائز کے سیب میں تقریباً 4  سے 5 گرام فائبر موجود ہوتا ہے، جو نظام انہضام کو بہتر بنانے اور قبض کے خطرے کو کم کرنے میں مددگار ثابت ہوتا ہے۔

صبح کے وقت سیب کھانے سے جسم کی اندرونی گھڑی (circadian rhythm) کے مطابق آنتیں زیادہ فعال رہتی ہیں، جس سے فائبر بہتر طریقے سے ہضم ہوتا ہے۔

سیب میں موجود پیکٹِن فائبر خون میں شوگر کی سطح کو کنٹرول کرنے میں بھی مددگار ہے اور ہاضمے کی رفتار کو سست کر کے دیر تک پیٹ بھرا رہنے کا احساس دیتا ہے، جو وزن کم کرنے میں معاون ثابت ہو سکتا ہے۔