آئی پی ایل میں روہت شرما کے بلے پر تنازع کھڑا ہو گیا

آئی پی ایل میں سابق بھارتی کپتان روہت شرما کے بلے کا تنازع کھڑا ہو گیا۔

بھارتی میڈیا کے مطابق ممبئی انڈینز کے کھلاڑی کو آفیشل کے ساتھ تفصیلی گفتگو کرتے ہوئے دیکھا گیا ، روہت شرما امپائر کو قائل کرنے کی کوشش کرتے رہے کہ بلے میں کوئی خرابی نہیں۔

تلک ورما نے بھی بعد میں آ کر گیج کو بیٹ سے گزارنے کی کوشش کی، متعدد بار چیک کرنے کے بعد امپائر نے روہت کو بلے سے کھیلنے کی اجازت دیدی۔ تلک ورما کو بعد میں کہتے سنا گیا کہ امپائر نے گیج کو غلط طریقے سے پکڑا ہوا تھا۔

میڈیا رپورٹ میں بتایا گیا کہ آئی پی ایل قوانین کے مطابق بلے کی چوڑائی 4.25 انچ اور موٹائی 1.56 انچ تک مقرر ہے، بلے کا ابھرا ہوا درمیانی حصہ 2.64 سے زیادہ نہیں ہوسکتا، بلے کی لمبائی 38 انچ کے اندر ہونی چاہیے۔