صارفین کو کم بجلی استعمال کرنے والے پنکھے دیے جائیں گے، قومی توانائی تحفظ اتھارٹی نے زیادہ بجلی استعمال کرنے والے پنکھوں کی تبدیلی کا جامع پلان وزارت خزانہ میں جمع کرا دیا۔
مجوزہ منصوبے کے مطابق پہلے مرحلے میں 9 کروڑ کے قریب پرانے پنکھوں کی جگہ نئے پنکھے لگانے کا منصوبہ ہے، اسٹیٹ بینک کی رسک گارنٹی پر بینکوں نے فنانسنگ پرآمادگی بھی ظاہر کر دی۔
ذرائع پاور ڈویژن کے مطابق بینک پنکھوں کی تبدیلی کیلئے 1500ارب روپے کا قرض دیں گے، پرانے پنکھوں کی جگہ صارفین کو کم بجلی استعمال کرنے والے پنکھے دیے جائیں گے۔
بینکوں کو رقم بجلی بلز میں ماہانہ قسط کی صورت میں واپس کی جائے گی،اسکیم کے تحت پہلے مرحلے میں 8کروڑ 80 لاکھ پرانے پنکھے تبدیل ہوں گے، ملک میں اس وقت 14کروڑ 70لاکھ غیر معیاری پنکھے استعمال ہو رہے ہیں۔
موقر قومی اخبار کی رپورٹ کے مطابق پرانے غیر معیاری پنکھے تبدیل کرنے سے پانچ ہزار میگاواٹ بجلی کی بچت ہوگی، صارفین کے گھروں پر لگے غیر معیاری پنکھے کی قیمت 1500 روپے مقرر ہوگی۔
