پاکستان تحریک انصاف کے رہنما اور قومی اسمبلی میں اپوزیشن لیڈر عمر ایوب کے وارنٹ گرفتاری خارج کر دیئے گئے۔
سرگودھا میں میڈیا سے گفتگو کرتے ہوئے عمر ایوب نے کہا ہے کہ اے ٹی سی نے میرے دونوں مقدمات میں وارنٹ گرفتاری خارج کر دیئے ہیں۔ ہم حق اور سچ کی جنگ لڑ رہے ہیں، ملک میں قانون کی بالادستی بہت ضروری ہے۔
انہوں نے مزید کہا کہ 5 گھنٹے انتظار کرنے کے باوجود مجھے اور شبلی فراز کو بانی پی ٹی آئی سے جیل میں ملاقات کی اجازت نہیں ملی۔شاہ محمود قریشی کی لاہور منتقلی کی مذمت کرتے ہیں۔
انہوں نے کہا کہ حکومت بیساکھیوں پر کھڑی ہے ، حکومت نئے انتخابات کروائے ،ملک میں کسی نئے آپریشن کی ضرورت نہیں، عوام کی رائے کو بھی اہمیت دینی چاہیے، عوام اور سیاستدانوں کو اعتماد میں لینا چاہیے۔
واضح رہے گزشتہ روز انسداد دہشتگردی عدالت سرگودھا کے جج نے عمر ایوب کے وارنٹ گرفتاری جاری کر دیئے تھے جس کے بعد پولیس نے ان کی گرفتاری کیلئے ان کے اسلام آباد میں واقع گھر پر چھاپہ بھی مارا تھا۔
