مکہ معاہدے کے تحت اسٹریٹجک پولیٹیکل ڈیفنس کمیٹی کا اہم اجلاس آج سعودی عرب کے دارالحکومت ریاض میں ہوگا جس میں نائب وزیر اعظم اسحاق ڈار،وزیر دفاع خواجہ آصف اورآرمی چیف فیلڈ مارشل عاصم منیر شرکت کریں گے۔
وزارت خارجہ کی جانب سے جاری بیان کے مطابق اجلاس میں خطے کی بدلتی صورتحال اور مکہ مشترکہ دفاعی معاہدے کے تحت جاری تعاون پر تبادلہ خیال کیا جائے گا۔
یہ اجلاس یمن کی بین الاقوامی سطح پر تسلیم شدہ حکومت کی جانب سے حوثیوں کے خلاف بڑے فوجی آپریشن کے آغاز کے ایک روز بعد ہورہا ہے۔
گزشتہ روز یمن کی صدارتی کونسل کے سربراہ رشاد العلیمی نے فوجی کارروائی شروع کرنے کا اعلان کرتے ہوئے مسلح افواج کو اپنی ذمہ داریاں ادا کرنے اور منظور شدہ منصوبوں کے مطابق کارروائیاں جاری رکھنے کی ہدایت کی۔
اجلاس میں شرکت کیلئے اسحاق ڈارسعودی عرب پہنچ گئے ہیں جبکہ خواجہ آصف اور فیلڈ مارشل عاصم منیر آج روانہ ہونگے۔
