فلپائن میں شدید زلزلے کے جھٹکے محسوس کیے گئے ہیں جن کی شدت ریکٹر اسکیل پر 8.2 ریکارڈ کی گئی ہے۔
زلزلہ پیما مرکز کے مطابق زلزلے کی گہرائی 35 کلومیٹر تھی زلزلے کے جھٹکوں کے فوراً بعد متعلقہ حکام نے ساحلی علاقوں کے لیے سونامی وارننگ جاری کر دی ہے۔
ابتدائی اطلاعات کے مطابق زلزلے کے باعث متعدد علاقوں میں خوف و ہراس پھیل گیا، جبکہ لوگ گھروں اور عمارتوں سے باہر نکل آئے۔ حکام نے شہریوں کو محفوظ مقامات کی طرف منتقل ہونے اور احتیاطی تدابیر اختیار کرنے کی ہدایت کی ہے۔
ریسکیو اور ہنگامی ادارے ممکنہ نقصانات کا جائزہ لے رہے ہیں جبکہ ابھی تک کسی بڑے جانی یا مالی نقصان کی تفصیلات سامنے نہیں آئیں۔ زلزلہ پیما مراکز صورتحال پر مسلسل نظر رکھے ہوئے ہیں اور آفٹر شاکس کا خدشہ بھی ظاہر کیا جا رہا ہے۔
حکام نے عوام سے اپیل کی ہے کہ وہ افواہوں پر توجہ نہ دیں اور صرف سرکاری معلومات پر اعتماد کریں۔
