مسجد نبویؐ کے امام شیخ علی عبدالرحمان الحذیفی نے مسجد نمرہ میں خطبہ حج دیتے ہوئے کہا ہے کہ تمام گناہ چھوڑ کر قیامت کے دن کی تیاری کی جائے، قیامت کے دن آنے میں کوئی شک نہیں۔
آخرت کی بہترین تیاری کا طریقہ اللہ کی عبادت ہے۔ اے ایمان والو! اللہ سے ڈرو، تقویٰ اختیار کرو، عہد کی پاسداری کرو۔ تقویٰ اختیار کرنا ایمان والوں کی شان ہے۔ اہل ایمان کابنیادی خاصہ ہےکہ وہ ہمیشہ اللہ کی توحید پر عمل پیرا رہتے ہیں۔
انہوں نے کہا کہ سی کو اللہ تعالیٰ کا شریک نہ ٹھہرایا جائے، رب کے سوا کسی غیر کی عبادت مت کرنا، توحید پر عملدرآمد اہل ایمان کا خاصا ہے، ایمان والوں کے سامنے اللہ کی آیات پیش کی جائیں تو ان کے دل نرم پڑ جاتے ہیں۔
شیخ ڈاکٹر علی الحذیفی نے کہا کہ مسلمان توحید کی دعوت پر لبیک کہتے ہیں ،یہ وہ عظیم جگہ ہے جہاں اللہ نے اپنا پاک کلام نازل فرمایا۔
خطبہ میں کہا گیا کہ نبی اکرم ﷺ اللہ کے آخری رسول ہیں، نبی اکرم ﷺ خاتم النبین ہیں، مسلمانوں کو ہر مصیبت میں صبر کا دامن ہاتھ سے نہیں چھوڑنا چاہئے۔ صبر کرنے والوں کیلئےاللہ تعالیٰ نے اجر عظیم کا وعدہ کیا ہے۔
