پاکستانی فلم انڈسٹری کی معروف اداکارہ ریما خان نے انکشاف کیا ہے کہ انہوں نے ایک بھارتی ایوارڈ شو میں بولڈ لباس پہننے سے انکار کردیا تھا۔
ریما خان نے حالیہ پوڈکاسٹ میں گفتگو کرتے ہوئے اپنی ذاتی اقدار، پیشہ ورانہ فیصلوں اور شوبز انڈسٹری کے تجربات پر تفصیلی روشنی ڈالی۔
اداکارہ نے بتایا کہ وہ ہمیشہ اپنے لباس کے انتخاب اور عوامی سطح پر اپنی پیشکش کے حوالے سے محتاط رہتی ہیں۔ ان کے مطابق بولڈ لباس پہننے سے انکار کا فیصلہ اس لیے کیا گیا کیونکہ وہ بین الاقوامی پلیٹ فارم پر پاکستان کی نمائندگی کررہی تھیں۔
ان کا کہنا تھا کہ ان کے لیے ثقافتی وقار اور ذاتی اصولوں کی پاسداری، رجحانات یا بیرونی دباؤ سے زیادہ اہمیت رکھتی ہے۔
گفتگو کے دوران ریما خان نے اس بات پر زور دیا کہ فنکار معاشرے پر گہرا اثر رکھتے ہیں، لہٰذا مشہور شخصیات کو اپنے الفاظ، رویے اور ظاہری انداز کے حوالے سے ذمہ داری کا مظاہرہ کرنا چاہیے۔
