اقوام متحدہ کی سلامتی کونسل میں پاکستان نے بھارت کو دوٹوک الفاظ میں واضح کر دیا ہے کہ جموں و کشمیر نہ کبھی بھارت کا حصہ تھا اور نہ ہی آئندہ ہو سکتا ہے۔
یہ بات پاکستانی قونصلر گل قیصر سروانی نے سلامتی کونسل کے اجلاس میں بھارتی نمائندے کے بیان پر سخت ردعمل دیتے ہوئے کہی۔
انہوں نے کہا کہ جموں و کشمیر ایک بین الاقوامی سطح پر تسلیم شدہ متنازع خطہ ہے، جس کی حیثیت کو یکطرفہ بیانات یا جھوٹے دعوؤں کے ذریعے تبدیل نہیں کیا جا سکتا۔ انہوں نے واضح کیا کہ مسئلہ کشمیر اقوام متحدہ کی قراردادوں کے مطابق حل طلب ہے اور کشمیری عوام کو اپنے مستقبل کے تعین کا حق حاصل ہے۔
پاکستانی قونصلر نے بھارت پر الزام عائد کیا کہ وہ خود دہشت گردی کی کھلی سرپرستی کر رہا ہے اور بارہا پاکستان کے خلاف جارحانہ اقدامات کا مرتکب ہو چکا ہے، جو ایک روگ اسٹیٹ کی سوچ کی عکاسی کرتے ہیں۔
