روس کے صدر ولادیمیر پیوٹن نے امریکا کی نئی پابندیوں پر ردعمل دیتے ہوئے کہا ہے کہ روس کبھی بھی امریکی دباؤ کے آگے نہیں جھکے گا۔
غیر ملکی خبر رساں ادارے کے مطابق صدرولادی میر پیوٹن Vladimir Putin کا کہنا تھا کہ امریکا کے غیر دوستانہ اقدامات روس اور امریکا کے تعلقات کو مزید کمزور کردیں گے، کوئی خوددار ملک دباؤ میں آ کر فیصلے نہیں کرتا۔
پیوٹن نے تسلیم کیا کہ واشنگٹن کی نئی پابندیاں روسی معیشت پر کچھ اثر ڈال سکتی ہیں، تاہم انہوں نے واضح کیا کہ روس اپنی پالیسیوں پر قائم رہے گا اور بیرونی دباؤ کے باوجود خودمختاری سے فیصلے کرے گا۔
واضح رہے کہ ٹرمپ کی جانب سے روسی تیل کی کمپنیوں پر نئی پابندیاں عائد کرنے پر روس کے صدر نے سخت موقف اختیار کیا ہے، ان کا کہنا ہے کہ ان پابندیوں کا مقصد کریملن پر دباؤ ڈال کر یوکرین میں جاری جنگ ختم کرانا ہے۔
