ناروے کی اوسلو یونیورسٹی کی نئی تحقیق میں انکشاف ہوا ہے کہ مردوں کا دماغ عمر کے ساتھ خواتین کے مقابلے میں زیادہ تیزی سے سکڑتا ہے۔
رپورٹ کے مطابق تحقیق میں 4 ہزار 700 سے زائد شرکاء کے دماغی اسکینز کا تجزیہ کیا گیا، جس سے معلوم ہوا کہ مردوں کے دماغ میں خلیاتی کمی اور حجم میں کمی کی رفتار خواتین کے مقابلے میں نمایاں طور پر زیادہ ہے، جبکہ خواتین کے دماغ کا سفید اور خاکستری مادہ مردوں کے مقابلے میں آہستہ آہستہ سکڑتا ہے.
ماہرین کے مطابق یہ فرق اس بات کی نشاندہی کرتا ہے کہ عمر رسیدگی کے دوران مرد و خواتین کے دماغ مختلف حیاتیاتی عمل سے گزرتے ہیں اور مردوں کے دماغ میں خلیاتی کمی کی شرح خواتین کے مقابلے میں کہیں زیادہ پائی جاتی ہے.
تحقیق کے مطابق عمر کے ساتھ انسانی دماغ کا سکڑنا ایک قدرتی عمل ہے، تاہم جن افراد میں الزائمر یا یادداشت سے متعلق بیماریوں کا خطرہ زیادہ ہوتا ہے، ان کے دماغ کا حجم عام افراد کے مقابلے میں تیزی سے کم ہوتا ہے۔
