گزشتہ 9 دنوں سے بند طورخم بارڈر کی تجارتی راہداری کھولنے کے حوالے سے اہم پیشرفت ہوئی ہے۔
ایک نجی چینل نے کسٹم ذرائع کے حوالے سے بتایا کہ طورخم سرحدی گزرگاہ 9 روز قبل ہر قسم کی آمدورفت کے لیے بند کر دی گئی تھی جسے اب کھولنے کی تیاریاں کی جا رہی ہیں۔
کسٹم ذرائع کا کہنا ہے کہ کارگو گاڑیوں کی کلیئرنس کے لیے اسکینرز طورخم ٹرمینل پہنچا دیئے گئے ہیں ، کسٹم حکام نے عملے کو فوری طور پر طورخم ٹرمینل پہنچنے کی ہدایت کی ہے۔
خیال رہے کہ پاکستان اور افغانستان کے درمیان حالیہ تناؤ کے باعث طورخم تجارتی گزرگاہ ہرقسم کی آمدورفت کے لیے بند کر دی گئی تھی۔
افغانستان جانے والے پھل، سبزی اور دیگر اشیاء سے بھری درجنوں گاڑیاں پاکستانی حدود میں موجود تھیں جبکہ شمالی وزیرستان سے غلام خان ، جنوبی وزیرستان سے انگور اڈہ جبکہ خرلاچی اور چمن سرحد کو بھی بند کر دیا گیا تھا۔
