کولمبیا نے غزہ کے لیے امداد لے جانے والی گلوبل صمود فلوٹیلا کے عملے میں شامل دو کولمبیائی خواتین کی گرفتاری کے بعد ملک میں موجود تمام اسرائیلی سفارتکاروں کو ملک بدر کرنے کا اعلان کر دیا۔
کولمبیا کے صدر گستاوو پیٹرو نے سخت ردعمل دیتے ہوئے کہا کہ اگر فلوٹیلا روکنے کی اطلاعات درست ہیں تو یہ اسرائیلی وزیراعظم کی جانب سے ایک نیا بین الاقوامی جرم ہے۔ سفارتکاروں کی ملک بدری کے علاوہ اسرائیل کیساتھ آزاد تجارتی معاہدہ فوری طور پر ختم کیا جا رہا ہے۔
صدر پیٹرو کے فیصلے کے بعد کولمبیا خطے کا وہ پہلا ملک بن گیا ہے جس نے فلوٹیلا واقعے پر اسرائیل کے خلاف اتنی بڑی سفارتی کارروائی کی ہے۔
انسانی حقوق کے کارکنوں اور فلوٹیلا منتظمین نے کولمبین صدر کے اس اقدام کو سراہا اور عالمی برادری سے مطالبہ کیا کہ وہ اسرائیل کی جارحیت اور بین الاقوامی قوانین کی خلاف ورزی پر عملی اقدامات کرے۔
