راولپنڈی: امریکی بحری جہاز یو ایس ایس وین ای میئر 2 روزہ دورے پر کراچی بندرگاہ پہنچ گیا۔
پاک فوج کے شعبہ تعلقات عامہ (آئی ایس پی آر) کے مطابق امریکی بحری جہاز کی آمد پر پاک بحریہ کے اعلیٰ حکام اور امریکی سفارتی عملے نے استقبال کیا۔
امریکی بحری جہاز کے دورے کا مقصد دونوں بحری افواج کے درمیان پیشہ ورانہ تعلقات کا فروغ ہے۔ اور دورے کے اختتام پر امریکی اور پاک بحریہ کے درمیان مشق کا انعقاد کیا جائے گا۔
آئی ایس پی آر کے مطابق امریکی بحری جہاز کے دورے سے قیام امن کی کاوشوں کو مزید فروغ حاصل ہو گا۔
