پاکستانیوں کو تاجکستان کی جانب سے ای ویزا اور ویزا آن ارائیول کی سہولت ملنے کا امکان ہے۔
وزیراعظم کے کوآرڈینیٹر برائے سیاحت سردار یاسر الیاس کی تاجکستان کے اعلیٰ حکام سے ملاقاتیں ہوئیں، ان ملاقاتوں میں پاکستانی شہریوں کیلئے ای ویزا اور ویزا آن ارائیول کی سہولت پر گفتگو بھی کی گئی۔
تاجکستان کی جانب سے ای ویزا اور ویزا آن ارائیول کی سہولت جلد فراہم کرنے کی یقین دہانی کرائی گئی ہے، دونوں ملکوں کے درمیان معاشی، تجارتی اور سیاحتی تعاون کو مزید مستحکم بنانے پر اتفاق بھی کیا گیا۔
تاجکستان کی جانب سے زرعی مصنوعات کے شعبے میں بارٹر ٹریڈ کی یقین دہانی کرائی گئی ہے۔ سردار یاسر الیاس نے کہا کہ یہ دورہ پاکستان اور تاجکستان کی دوستی کا ثبوت ہے، ہمارا ہدف پائیدار شراکت داری اور باہمی تجارتی مواقع پیدا کرنا ہے۔
