قومی ٹیم کے سابق کپتان وسیم اکرم نے اپنے مجسمے کے حوالے سے بیان دے دیا ہے۔
سماجی رابطے کی ویب سائٹ ایکس پر سابق کپتان نے اپنے مجسمے کے ساتھ چیتے کے مجسمے کی تصویر لگا کر لکھا کہ میرا مجسمہ یقیناً اس چیتے سے بہتر ہے۔
ایکس پر ٹوئٹ میں ان کا کہنا تھا کہ نیاز اسٹیڈیم حیدر آباد میں لگائے گئے میرے مجسمے کے حوالے سے بہت باتیں ہو رہی ہیں، میرے خیال میں آئیڈیا کی زیادہ اہمیت ہوتی ہے۔
وسیم اکرم کا کہنا تھا کہ مجسمہ بنانے والے کو کریڈٹ دینا چاہیے، اس کوشش پر اور جو جو اس میں شامل رہا ہے انہیں فل مارکس دینے چاہئیں۔
یاد رہے کہ سابق فاسٹ باؤلر کا نیاز اسٹیڈیم حیدر آباد میں حال ہی میں مجسمہ نصب کیا گیا ہے جو شائقین کو متاثر نہ کر سکا، اس مجسمے پر کرکٹ کے مداحوں نے شدید تنقید کی۔
