اسلام آباد: چینی وزیر اعظم لی چیانگ 11 برس بعد پاکستان کے دورے پر اسلام آباد پہنچ گئے۔
وزیر اعظم شہباز شریف نے ایئرپورٹ پر چینی وزیر اعظم کا استقبال کیا۔ نائب وزیر اعظم اسحاق ڈار، وزیر داخلہ محسن نقوی، احسن اقبال اور عطاتارڑ بھی موجود تھے۔
چینی وزیر اعظم لی چیانگ کے پاکستان پہنچنے پر انہیں 21 توپوں کی سلامی دی گئی۔ چین کے کسی بھی وزیر اعظم کا 11 سال میں یہ پہلا دورہ پاکستان ہے۔ لی چیانگ اور شہباز شریف کے درمیان وفود کی سطح پر سی پیک، معاشی تعاون اور دوطرفہ تجارت پر بات ہو گی۔ جبکہ ملاقات میں علاقائی اور عالمی صورتحال پر بھی تبادلہ خیال کیا جائے گا۔
پاکستان کے دفتر خارجہ کی ترجمان کے مطابق چینی وزیر اعظم لی چیانگ وزیر اعظم شہباز شریف کی دعوت پر پاکستان کے دورے پر پہنچے ہیں۔
چینی وزیر اعظم 17 اکتوبر تک پاکستان میں قیام کریں گے۔ جن کے ہمراہ تجارت، خارجہ، قومی ترقی اور اصلاحاتی کمیشن کے وزرا بھی ہیں۔ وفد میں چائنہ انٹرنیشنل ڈویلپمنٹ کارپوریشن ایجنسی اور دیگر سینیئر حکام بھی شامل ہیں۔
