امیر جماعت اسلامی پاکستان حافظ نعیم الرحمان نے کہا ہے کہ حکومت دھرنے میں رکاوٹ نہ ڈالے۔ دھرنا ہر حال میں ہو گا روکا گیا تو حالات خراب ہوں گے۔
امیر جماعت اسلامی پاکستان حافظ نعیم الرحمان نے اپنے ایک بیان میں کہا کہ پورے ملک سے قافلے اسلام آباد کے لیے روانہ ہو چکے ہیں۔ ہم مہنگی بجلی کے ذمہ دار آئی پی پیز سے چھٹکارا چاہتے ہیں۔
انہوں نے کہا کہ حکومت کو وارننگ دے رہے ہیں کہ دھرنے میں رکاوٹ نہ ڈالے۔ اگر رکاوٹ ڈالی گئی تو پھر پورے ملک میں احتجاج ہوں گے اور حالات کی ذمہ دار حکومت ہو گی۔
حافظ نعیم الرحمان نے کہا کہ ہم سب گرفتاری کے لیے تیار ہیں اور پاکستانی عوام ہماری طرف دیکھ رہی ہے۔ حکومت قوم سے قربانی مانگ رہی ہے مگر خود قربانی نہیں دے رہی۔
انہوں نے کہا کہ آئی پی پیز کے ساتھ معاہدہ کرنے والوں کے خلاف اور عوام کے حق میں دھرنا دیں گے۔ پاکستان کے لوگ ان ظالمانہ حکمرانوں کو نہیں مانتے۔ عوام ہر طرح کے حالات کے لیے تیار رہیں۔
امیر جماعت اسلامی نے کہا کہ بجلی کے بلوں میں بھاری بھرکم ٹیکس لگا کر آئی ایم ایف کا ایجنڈا پورا کیا جا رہا ہے۔ حکومت کی ذمہ داری ہوتی ہے امن و امان، صحت اور تعلیم کی سہولتیں فراہم کرے۔ اگر حکومت سہولتیں نہیں دے سکتی تو ٹیکس کیوں لگا رہی ہے؟
