حیدر آباد کےعلاقے کچا قلعہ مکی شاہ روڈ سے متصل ریلوے ٹریک کے قریب کریکر دھماکا ہوا ، ریلوے ٹریک محفوظ رہا تاہم کچھ دیر کیلئے ٹرینوں کی آمدورفت معطل رہی۔
دھماکے کی آواز دور تک سنی گئی ، اطلاع ملتے ہی پولیس کی بھاری نفری اور سی ٹی ڈی حکام جائے واقعہ پر پہنچ گئے ۔پولیس کے مطابق دھماکا ہینڈ کریکر کا تھا، ریلوے ٹریک کو کوئی نقصان نہیں پہنچا۔
ایس پی سی ٹی ڈی کے مطابق دھماکے کے بعد ٹرینوں کو مختلف ریلوے اسٹیشنوں پر روک دیا گیا تاہم بی ڈی ایس عملے کی جانب سے ٹریک کو کلیئر قرار دینے کے بعد ٹرینوں کی آمد و رفت بحال کر دی گئی ہے۔
سی ٹی ڈی حکام کے مطابق حالیہ دھماکا ایک کالعدم قوم پرست جماعت کے کارکنوں کی گرفتاری کا ردعمل بھی ہو سکتا ہے تاہم واقعے کی تفتش جاری ہے۔
