کبھی رات کے آسمان پر ایک چمکتی ہوئی لکیر دیکھی ہے جو پلک جھپکتے غائب ہو جاتی ہے؟ ہم اسے عام طور پر ٹوٹتا تارہ یا shooting star کہتے ہیں، مگر حقیقت میں یہ کوئی تارہ نہیں ہوتا۔
ٹوٹتا تارہ درحقیقت خلا سے آنے والا چھوٹا سا پتھر یا گرد و غبار کا ذره ہوتا ہے جو زمین کی فضا میں داخل ہوتے ہی تیز رفتاری سے جل اٹھتا ہے، جس کی وجہ سے آسمان پر ایک چمکتی ہوئی لکیر بنتی ہے، جو دیکھنے والوں کو کسی جادوئی لمحے کا احساس دلاتی ہے۔
نیشنل ایروناٹکس اینڈ اسپیس ایڈمنسٹریشن کے مطابق جب یہ چھوٹے پتھر زمین کی فضا میں داخل ہو کر جلتے ہیں تو انہیں میٹیور کہا جاتا ہے، اکثر یہ فضا ہی میں جل کر ختم ہو جاتے ہیں، لیکن کبھی کبھار ان میں سے کوئی بڑا ٹکڑا زمین تک پہنچ جائے تو اسے میٹیورائٹ کہا جاتا ہے۔
ناسا کے مطابق روزانہ تقریباً 48.5 ٹن میٹیورک مواد زمین پر گرتا ہے، اور اگر کوئی میٹیور اتنا روشن ہو کہ سیارے وینس سے بھی زیادہ چمکے، تو اسے فائر بال کہا جاتا ہے۔
