آئرلینڈ کے آل راؤنڈر سِمی سنگھ نے پروفیشنل کرکٹ سے ریٹائرمنٹ کا اعلان کردیا۔
بھارتی ریاست پنجاب میں پیدا ہونے والے سِمی سنگھ 2006 میں 19 سال کی عمر میں آئرلینڈ منتقل ہوئے تھے، تاہم انہیں آئرلینڈ کی جانب سے انٹرنیشنل کرکٹ میں ڈیبیو کرنے کے لیے مزید 11 سال انتظار کرنا پڑا۔ انہوں نے 2017 میں 30 سال کی عمر میں آئرلینڈ کی نمائندگی کا آغاز کیا۔
35 ون ڈے اور 53 ٹی ٹوئنٹی میچز
سِمی سنگھ نے اپنے انٹرنیشنل کیریئر کے دوران آئرلینڈ کی جانب سے 35 ون ڈے اور 53 ٹی ٹوئنٹی انٹرنیشنل میچز کھیلے۔
انہوں نے مجموعی طور پر 2 ہزار سے زائد رنز بنائے جبکہ 83 وکٹیں بھی حاصل کیں۔ ون ڈے کرکٹ میں ان کی بولنگ خاص طور پر نمایاں رہی جہاں ان کا اکانومی ریٹ صرف 3.99 تھا۔
سِمی سنگھ نے اپنا آخری انٹرنیشنل میچ 2022 کے ٹی ٹوئنٹی ورلڈ کپ میں آسٹریلیا میں سری لنکا کے خلاف کھیلا تھا۔
