مردان: امیر جماعت اسلامی حافظ نعیم الرحمن نے کہا ہے کہ 20 ستمبر سے ملک کے کونے کونے سے عوام کا سمندر اسلام آباد کی جانب چلے گا، دوسری جانب حکومت نے جماعت اسلامی کو ایک بار پھر مذاکرات کی دعوت دے دی ہے۔
جلسہ عام سے خطاب کرتے ہوئے حافظ نعیم الرحمن نے کہا کہ کراچی سے ٹرین مارچ شروع ہوگا جبکہ روہڑی، حیدرآباد اور دیگر مقامات سے بھی لوگ اس میں شامل ہوں گے۔
انہوں نے کہا کہ وزیراعظم عوام کے موڈ کا اندازہ کریں، ایک دن میں کئی کئی جلسے عوام کے جوش و خروش کا ثبوت ہیں، سوات، بٹ خیلہ، دیر، کراچی، لاہوراور گوجرانوالہ کے جلسے عوام کے اعتماد کا اظہار ہیں۔
امیرجماعت اسلامی نے کہا کہ ہر روز عوام پر پٹرول بم گرائے جا رہے ہیں، عالمی مارکیٹ کی آڑ میں عوام کا خون نچوڑا جا رہا ہے، بھارت، بنگلہ دیش اور دیگر ممالک میں پٹرولیم مصنوعات کی قیمتوں میں معمولی اضافہ ہوا، جبکہ پاکستان میں عوام پر اضافی بوجھ ڈالا جا رہا ہے۔
حافظ نعیم الرحمن نے دعویٰ کیا کہ پٹرول پر 80 روپے لیوی اور 21 روپے کسٹم ڈیوٹی عائد کی جا رہی ہے، جبکہ آئل ریفائنریز اور مارکیٹنگ کمپنیاں الگ سے لوٹ مار کر رہی ہیں۔
انہوں نے کہا کہ جماعت اسلامی نے حکومت کی مذاکرات کی پیشکش قبول کرکے اپنی حجت تمام کی اور ورکنگ کرکے پٹرولیم لیوی کا متبادل بھی حکومت کو پیش کیا، تاہم عوام کو مطلوبہ ریلیف نہیں ملا۔
