پاکستان کے معروف نوجوان گلوکار حسن رحیم نے اپنا نیا گانا “بے وجہ” گلگت کی جھلک کے ساتھ ریلیز کر دیا ہے۔
حسن رحیم کا یہ گانا جدائی اور ادھورے جذبات پر مبنی ایک پُرسوز نغمہ ہے۔ اس گانے میں شمالی پاکستان کی موسیقی کی جھلک نمایاں طور پر شامل ہے، جسے جدید انداز میں اس طرح پیش کیا گیا ہے کہ یہ محبت میں پیدا ہونے والی غلط فہمیوں اور جذباتی فاصلے کی کیفیت کو خوبصورتی سے بیان کرتا ہے۔
گانے میں ایک منفرد پہلو شینا زبان کا شامل ہونا ہے، جو گلگت بلتستان میں بولی جاتی ہے، جبکہ باقی اشعار اردو کے ایک مخصوص ادبی انداز میں لکھے گئے ہیں، جس سے اسے ایک واضح ثقافتی اور لسانی تنوع حاصل ہوتا ہے۔
گلوکار نے اپنی انسٹاگرام پوسٹ میں وضاحت کی کہ ویڈیو میں پیش کیا گیا پولو کا انداز روایتی بین الاقوامی طرز کا نہیں بلکہ فری اسٹائل پولو ہے، جو بغیر کسی رسمی قواعد اور ریفری کے کھیلا جاتا ہے اور شندور پولو فیسٹیول کے حوالے سے خاص شہرت رکھتا ہے۔ انہوں نے ناظرین کو اس کھیل کے بارے میں مزید جاننے اور اسے براہِ راست دیکھنے کی ترغیب بھی دی۔
