پاکستان کی معروف اداکارہ ثروت گیلانی کی ناک کی سرجری کا ذکر کرنے پر سوشل میڈیا پر بحث چھڑ گئی ہے۔
ثروت گیلانی نے وائرل ہونے والی ایک ویڈیو میں بتایا کہ کالج کے دنوں میں انہیں بے ہوشی کا مسئلہ درپیش تھا، اور ایک موقع پر وہ باتھ روم میں بے ہوش ہو کر سنک سے ٹکرائیں، جس کے نتیجے میں ان کی ناک شدید زخمی ہو گئی۔
اداکارہ نے کہا کہ ہوش میں آنے پر ناک سے خون بہہ رہا تھا اور کپڑوں پر پھیل چکا تھا، فوراً والدہ کو مطلع کیا گیا، جنہوں نے انہیں ایک ماہر سرجن کے پاس لے جایا۔
ثروت گیلانی نے بتایا کہ ڈاکٹرز کے مشورے اور والدہ کے اصرار پر انہوں نے فوری طور پر ناک کی سرجری کروائی، جس دوران ناک میں معمولی سی کاسمیٹک تبدیلی بھی کی گئی، جس کے بعد نہ صرف ان کے اعتماد میں اضافہ ہوا بلکہ بار بار بے ہوش ہونے کا مسئلہ بھی ختم ہو گیا۔
اداکارہ نے مزید وضاحت کی کہ وہ اس وقت اپنی بیس کی دہائی میں تھیں اور سرجری کے بعد ان کی ناک سوجھی ہوئی تھی، تاہم وہ نتیجے سے مطمئن تھیں کیونکہ تبدیلی صرف معمولی نوعیت کی تھی۔
