نیپال کے ہاتھوں ٹی ٹوئنٹی سیریز میں تاریخی شکست پر ویسٹ انڈیز کے کپتان عقیل حسین اپنی ٹیم پر برس پڑے۔
عقیل حسین کا کہنا تھا کہ ہمیں یہ جلد سمجھنا ہو گا کہ یہ انٹرنیشنل کرکٹ ہے، آپ بینچ مارک بنانا چاہتے ہیں اور اس سطح تک نہیں پہنچ پاتے تو پھر آپ کو آئینہ دیکھنا ہو گا۔
انہوں نے کہا کہ آئینہ دیکھ کر خود سے پوچھنا چاہیے کہ کیا ہم واقعی انٹرنیشنل سطح کے کھلاڑی ہیں، جو ٹیم مسلسل اکٹھے کھیل رہی ہو تو اسے پلان کے مطابق کھیلنا ہوتا ہے۔
ویسٹ انڈیز کے کپتان نے مزید کہا کہ یہ صرف ناموں کی اور ماضی کی بات نہیں، آپ کو یہ دیکھنا ہے کہ اب آپ کیا کرتے ہیں، آپ کو جلد کنڈیشنز سمجھنا ہوتی ہیں۔ 174 رنز کا ہدف دینے پر نیپال کے بیٹرز کی تعریف کروں گا ، ہمارے بائولرز کو کم رنز دینے چاہیئں تھے۔
واضح رہے کہ آئی سی سی فل ممبر ٹیم ویسٹ انڈیز کے خلاف نیپال نے پہلی مرتبہ ٹی ٹوئنٹی سیریز جیت کر تاریخ رقم کر دی ہے۔
