وزیر خزانہ محمد اورنگزیب نے کہا ہے کہ حکومت کا کام کاروبار کرنا نہیں بلکہ اس کیلئے سازگار ماحول فراہم کرنا ہے، تنخواہ دار طبقے پر ٹیکس کا بوجھ مزید کم کرنیکی کوشش کرینگے۔
کراچی میں جاب فیئر کے افتتاح کے موقع پر گفتگو کرتے ہوئے وزیر خزانہ نے کہا کہ معیشت کی بہتری کیلئے اقدامات کیے جا رہے ہیں ، معاشی اصلاحات سے ہی ترقی ممکن ہے، پائیدار ترقی کیلئے سب کو مل کر کام کرنا ہو گا۔
ان کا کہنا تھا کہ جاب فیئرکا انعقاد خوش آئند اقدام ہے، جاب فیئرسے روزگار کےمواقع میسر آئیں گے، معاشی استحکام کیلئے پرائیویٹ سیکٹر کو کردار ادا کرنا ہو گا، کارپوریٹ سیکٹرکی کمی محسوس کی جا رہی ہے ،پرائیویٹ سیکٹرنے ہی ملک کو چلانا ہے۔
انہوں نے کہا کہ عملی زندگی میں کوئی شارٹ کٹ نہیں ہوتا،محنت کو شعار بنانا ہو گا، اداروں میں آٹومیشن کا نظام لا رہے ہیں ، ملک میں مہنگائی کی شرح میں مزید کمی آئے گی ،اسٹیٹ بینک ایکسچینج اور شرح سود کے حوالے سے کام کر رہا ہے۔
