لاہور: سابق وزیر اعظم اور مسلم لیگ ن کے صدر نواز شریف نے کہا ہے کہ اللہ کرے ہم پھر ٹیک آف کر سکیں۔
مسلم لیگ ن کے صدر نواز شریف اور وزیر اعلیٰ پنجاب مریم نواز سے اراکین پنجاب اسمبلی نے ملاقات کی۔ ملاقات میں ترقیاتی منصوبوں میں پیشرفت سے متعلق امور پر تبادلہ خیال کیا گیا۔
نواز شریف نے کہا کہ وزیر اعظم شہباز شریف بہت محنت کر رہے ہیں۔ اور محنت سے عوام کی خدمت کا سفر جاری رکھنا ہے۔ اللہ کرے ہم پھر ٹیک آف کر سکیں۔
انہوں نے کہا کہ لاہور سمیت پنجاب کے لوگ مطمئن اور خوش نظر آ رہے ہیں۔ جبکہ اللہ تعالیٰ نے گڑھے میں گرتے ملک اور قوم کو بچا لیا۔ زندگی میں بہت اتار چڑھاؤ دیکھے ہیں۔ اور ن لیگ جب آتی ہے تو ملک میں ترقی ہوتی ہے۔
صدر مسلم لیگ ن نے کہا کہ ترقی کا سفر جاری رہتا تو پاکستان آج کہیں آگے کھڑا ہوتا۔ تاہم اب مہنگائی میں کمی سے عوام کو سکھ کا کچھ سانس آیا ہے۔ اور پالیسی ریٹ میں کمی معاشی بہتری کی علامت ہے۔
