اوگرا نے ایل پی جی کاروبار کے لئے نئی ایڈوائزری کا باقاعدہ نوٹیفکیشن جاری کر دیا ہے۔
آئل اینڈ گیس ریگولیٹری اتھارٹی نے غیر معیاری ایل پی جی سلنڈرز کی خرید و فروخت پر پابندی عائد کر دی ہے۔ اوگرا نے غیر معیاری سلنڈرز میں ایل پی جی کی ری فلنگ کو غیرقانونی اور خطرناک قرار دے دیا۔
اوگرا کی جانب سے جاری نوٹیفکیشن میں کہا گیا ہے کہ غیر مجاز ڈسٹری بیوٹرز کو ایل پی جی سلنڈرز اور گیس فروخت کرنے پر مارکیٹنگ کمپنیوں کے خلاف کارروائی ہو گی، ایل پی جی کا کاروبار صرف مجاز ڈسٹری بیوٹرز ہی کر سکیں گے۔
نوٹیفکیشن کے مطابق ملک بھر میں 313 ایل پی جی مارکیٹنگ اور 19 سلنڈر بنانے والی کمپنیوں کو نوٹس جاری کیے گئے ہیں،اوگرا نے غیر معیاری سلنڈرز میں ایل پی جی کی ری فلنگ کو غیرقانونی اور خطرناک قرار دیتے ہوئے ایل پی جی کے کاروبار کے نئے ضابطہ اخلاق بنا دیے۔
اوگرا حکام کے مطابق سال ہا سال سے کوئی قانون موجود نہیں تھا جو تھا اس پر عملدرآمد نہیں ہو رہا تھا،غیر معیاری ایل پی جی سلنڈرز پھٹنے کے حادثات بہت بڑھ چکے تھے۔
نوٹیفکیشن میں کہا گیا ہے کہ مانیٹرنگ کے تمام تر اختیارات ڈپٹی کمشنر اور اسسٹنٹ کمشنر کے پاس ہوں گے۔
