یادداشت بچوں کی سیکھنے کی صلاحیت کا بنیادی ستون ہے، اسکول کے اسباق یاد رکھنا ہو یا روزمرہ معلومات ذہن میں محفوظ رکھنی ہو، مضبوط یادداشت بچے کی کامیابی میں اہم کردار ادا کرتی ہے۔
ماہرینِ تعلیم کے مطابق یادداشت کوئی پیدائشی صلاحیت نہیں بلکہ مسلسل مشق اور درست طریقۂ کار سے بہتر بنائی جا سکتی ہے، آکسفورڈ لرننگ سینٹر کی ایک حالیہ رپورٹ میں بچوں کی یادداشت مضبوط کرنے کے 11 سادہ مگر مؤثر طریقے بتائے گئے ہیں
1۔ سوال کرنے کی عادت ڈالیں
بچوں کو ہر سبق سمجھ کر سوال کرنے کی ترغیب دیں۔ سوال کرنے سے نہ صرف سمجھ گہری ہوتی ہے بلکہ معلومات دیر تک یاد رہتی ہیں۔
2۔ سبق کو گانے یا نظم کی شکل دیں
مشکل معلومات کو دھن یا نظم میں یاد کرنا دماغ کے لیے آسان ہو جاتا ہے۔
3۔ سیکھنے کو دلچسپ بنائیں
کتابوں سے ہٹ کر ویڈیوز، تصاویر اور تجرباتی سرگرمیاں شامل کریں۔ دلچسپ طریقے یادداشت کو فعال بناتے ہیں۔
4۔ سرگرم سیکھنے کی ترغیب دیں
بچوں سے بات چیت کریں، ان کے خیالات سنیں، اور انہیں اپنے الفاظ میں سبق دہرانے دیں۔
5۔ تصویری مواد کا استعمال کریں
فلیش کارڈز، چارٹس اور ڈایاگرامز بچوں کو چیزیں یاد رکھنے میں مدد دیتے ہیں۔
6۔ اپنی مثالیں بنانے دیں
بچے جب اپنے تجربات سے مثالیں دیتے ہیں تو معلومات بہتر طور پر ذہن نشین ہوتی ہیں۔
7۔ مائنڈ میپس بنوانے کی عادت ڈالیں
کسی موضوع کے اہم نکات کو مائنڈ میپ کی شکل میں جوڑنے سے یادداشت بہتر ہوتی ہے۔
8۔ کلیدی الفاظ پر توجہ دیں
ہر سبق کے اہم الفاظ اور جملے لکھیں، پھر ان کے درمیان تعلق سمجھائیں۔
9۔ سبق سکھانے کا موقع دیں
بچوں سے کہیں کہ وہ آپ کو یا کسی دوست کو سبق سمجھائیں۔ اس عمل سے انہیں سمجھنے اور یاد رکھنے میں مدد ملتی ہے۔
10۔ تمام حواسِ خمسہ کا استعمال
سیکھنے میں دیکھنے، سننے اور چھونے جیسے حواس کو شامل کرنا یادداشت کو مستحکم کرتا ہے۔
11۔ معلومات کو چھوٹے حصوں میں تقسیم کریں
ایک ساتھ زیادہ معلومات یاد کرنے کے بجائے اسے مختصر حصوں میں بانٹیں۔
